నువ్వూ నేనూ
ఎప్పుడూ కలవని రెండురూపాలు
వయసులు వేరు
మనసులు వేరు
పెరిగింది వేరు
ఎరిగింది లేదు
తిరిగిపోయే మార్గం తెలీదు
నువ్వూ నేనూ
ఇప్పుడే వదలనన్న చీకటి రాత్రిలో
పక్కపక్కనే రెండు కదలని పాన్పులపై
ఉన్న ఒకే కిటికీలోంచి
బయటపడుతున్న చిన్న వానచుక్కల్లో
స్వేచ్ఛను ఆనందాన్ని ఆరోగ్యాన్ని నెమరువేసుకుంటూ
నువ్వూ నేనూ
తప్పక వస్తానన్న సూర్యుని ప్రభాతంలో
పక్కపక్కనే ఎన్నో కదలికల మార్పులతో
ఉన్న ఒకే కిటికీలోంచి
మదినితడుతున్న సన్నని భానుకిరణాల్లో
స్నేహాన్ని ఆహ్లాదాన్ని ఆత్మీయతల్ని కలిపేసుకుంటూ
నువ్వూ నేనూ
ఈ రోజు ఇక్కడ కలిసిన మూగజీవాలే!
నువ్వూ నేను
మరో రోజు ఇక్కడే విడిపోయే కాకతాళీయస్నేహాలే!
నువ్వూ నేనూ
ఆ వానచుక్కా భానుకిరణాల్లా కలిసిన సప్తవర్ణచిత్రాలే!
(చంద్ర రెంటచింతల - మార్చి 5 2017)
No comments:
Post a Comment