నింగిలో చంద్రకిరణాలకై వేచే చకోరపక్షీ!
ఊళ్ళో నీ పుట్టుపూర్వోత్తరాలు ఎవరూ అడగట్లేదేం?
నీళ్ళల్లో ఈదేస్తే గడ్డుకు చేరతాననుకునే ఓ చేపా!
బళ్ళల్లో నిన్నట్టుకెళ్ళేప్పుడు ఎవరూ నీ దారిసొద వినట్లేదేం?
అగ్గిలో బుగ్గైపోతున్నానంటున్న ఓ వెతలమానవా!
ఒగ్గేశాక నిన్నెత్తేవారెవరనే బాధ నిన్ను తొలవలేదేం?
నింగికైనా నిచ్చెనలేయగలననే నిరర్థకప్రయత్నచరమా!
నీవెక్కాలనే నిచ్చెనమెట్లు నీకై గట్టిపడేదెక్కడో వెదకలేదేం?
మట్టిలో హర్మ్యాలను తవ్వే తరూభక్షకా!
ఆ గుట్టల శిథిలాల్లో విత్తులు నాటిన పూర్వీకులను కనిపెట్టలేదేం?
పంచభూతాల్లో వెదుక్కోలేని మూలాల్ని
పంచభూతాలై నీకొచ్చిన శక్తి నిలిచే కాలంలో
పాంచభౌతిక శరీరాన్ని అడ్డం పెట్టుకుని
పంచుకు తిరిగేంత మంచితనం చేయడం వెతకక
పంచుకు బతికేంత గోడల్ని కట్టేసుకుంటావేం?
నీకున్న శక్తి నీకు ఇచ్చిందెవరని
నీదన్న భుక్తి నీకు దక్కించిందెవరని
నీవున్న నేలను నిలవక తిప్పేదెవరని
నీపైని నీలాకాశం నిలిపే గొప్పెవరిదని
నీకే తెలపని వయసులగాలము
నీడన నడవకు కోసులదూరము
నీదని బతికే నిమిషపుకాలము
వీడని నడకే కర్మలజాలము!
వాడని నడతే ధర్మపుమూలము!
ప్రశ్నలమూటల బరువులు దించి
జవాబుబాటల తరువుల పెంచి
మంచికి నీడవు నీవే అయితే
పంచన పగులును పేర్చిన గోడలు!
పంచిన పెరుగును నీవను జాడలు!
పంచభూతాలే నీతో తిరిగెడి నీవగు నీడలు!
No comments:
Post a Comment