ధర్మయోగిని

నిన్నటివరకు
చలిలో వణుకుతూ
ధైర్యం తొణుకుచూ,
వానకు తడుస్తూ
ఆ నీటిలో దాహం తీర్చుకుంటూ,
ఎండకు ఎండుతూ
కిరణాలతో హరితచామరాల చేసుకుంటూ,
నిన్ను నీవుగా
ధీరోదాత్తగా
ధర్మపు కర్తగా
మోక్షవిహితగా
పరిచయం చేసుకున్న
గులాబీ మొగ్గా!
ఈ రోజు సూర్యుణ్ణిచూస్తూ
రెక్కల్ని విచ్చుకుని
గాలికి పరిమళాల్ని అద్ది
బాలికలా నవ్వుతూ
నేస్తంవా కనబడితే
ఇంటికి తీసుకెళ్ళి
పెంచుకోవాలని
చిట్టితల్లంది!
నువ్వొస్తే
నాలుగురోజుల చుట్టానివంటున్నా
నిను పిలిచే ధైర్యం చేయలేనంటున్నా
పసిమనసు వదలక పిలిస్తే
పెద్దమనసుతో చక్కగా వచ్చి
పాపకు నేస్తమయ్యావు!
దేవుడికి పుష్షమయ్యావు!
నాకు అక్షరమయ్యావు!
నీ స్నేహంతో మాలో ఒకటయ్యావు!
మా స్నేహంలో దైవత్వంనింపి దేవతవయ్యావు!
మోక్షసంప్రాప్తి తెలిసిన సత్యయోగము నీదే!