ఎవరిపై ఏ మాల
ఎందుకీ కులాల గోల
ఎగిరే మంటల లీల
ఎరుపేనా జీవన హేల
ఏదీ తడిమే ప్రసారమీవేళ
ఎవరు చస్తే
ఎవరు బతికితే
ఏమరుపాటే ఎరుకలో లేక
ఈ కథే జీవనం అంటూ
కోరలేని సమాజం వింటూ
రుమాలు వేసి
సమాలు చూసి
గుమ్మాలకేసి
చూపు పడేసి
ఓదార్పనేసి
ప్రతిఙ్ఞలోసి
ప్రతిదీ కాసి
పరాకు చేసే
ఖరారు బాబుల
షరా రుబాబుల
పనులే మొత్తం
ప్రపంచమంతా
ప్రతిధ్వనిస్తే
ప్రతిదీ చూస్తే,
మనుషులమంటే
మృగాల గోల
మనసుల్లేవని
మరీ అదోలా
మరుగున చూస్తే
మతలబులేని
మది కడిగేస్తే
ఏమరుపాటును
ఎటో వాటంగా
పల్లెల బాల్యపు
పదునును తీసి
ప్రతిదీ చూసి
మనసెనకేసి
మరీ అదోలా
సడులే లేని
అలజడులే చేరని
బతుకుల తీస్తే
అగ్గిరేగని కమ్మరి కొలిమి
ఏదీ కదలని కిరాణా కొట్టు
చదునైపోయిన వరి మాగాణి
దూరపుకొండల ఆగిన గుండె
ఎదురుచూపుల బస్సుల ఊళ్ళు
అదిమేచేతుల ముసలి చలిబట్ట
ఏదీ చేరని అడవి బలిగుట్ట
వాగులుదాటిన చదువరి పట్టు
వదలక ఎక్కే కాలిమెట్టెల మెట్టు
బదులేకోరని అనాథ బిడ్డ
చలిలో చచ్చే కర్మ జవానులు
చితులలో చేతి చేనేతకారుల ఆనులు
కనులునిండిన జలాలకు ఒడ్డా!
బతుకులనిండా కథలకు అడ్డా!
కదలనియ్యవా మనసులనదిమి
కలిసి చేయవా వార్తల చెలిమి!
కమిలి పేర్చవా చెడునకు కొలిమి
కలిసి మార్చవా గుండెల బలిమి
కనులచేర్చవా మనుషుల కలిమి!
No comments:
Post a Comment