తెలుగు నాది

అంతర్జాతీయ మాతృభాషాదినోత్సవం సందర్భంగా తెలుగుకోసం తెలుగువారికోసం .. 

తెలుగు అనాది

తెలుగు పునాది

తెలుగు నీది

తెలుగు నాది

తెలుగు వినేది

తెలుగు అనేది 

తెలుగు మనది!

తెలియకుంటే 

తెలియదంటే 

పదోగది దాటాక కనబడనిదా తెలుగు?

పరుగు విక్రమార్కుల ఒడివడనిదా తెలుగు?

పట్టణ వలసవాక్కుల్లో మరుగయినదా తెలుగు?

పలుకు ఆంగ్లపు ప్రయోక్త లాస్యాల్లోనిదా తెలుగు?

పెళుకు వాక్కుల సినీ హాస్యాల్లోనిదా తెలుగు ?

పతిపత్నుల ప్రకోపాల భాష్యాల్లోనిదా తెలుగు? 

వ్యాపార ముసుగుల లోపాల్లోనిదా తెలుగు ?

అంతరించే భాషల ఆరాటానికా తెలుగు!

తెలుసుకుంటే 

తెలుపుతుంటే 

అమ్మ మాటలా తెలుగు

అష్టాచెమ్మాటలా తెలుగు

బూడిద గుమ్మట్లో తెలుగు

పూడిక పెరట్లో తెలుగు 

ఉగాది పచ్చట్లో తెలుగు 

జనాల ముచ్చట్లో తెలుగు  

పురిటి నొప్పిళ్ళలో తెలుగు

పండుగ గొబ్బిళ్ళలో తెలుగు

ప్రథమ పూజలప్పుడూ తెలుగు

పుడకలోపోయేప్పుడూ తెలుగు 

ప్రాచీన భాషగా వెలుగులలో తెలుగు

పసుపు ముంగిళ్ళ పదును ఆరోగ్యంలో తెలుగు

పండు గోరింటాకు పసిచేతుల్లో తెలుగు 

పదును ముత్తైదువల పసుపువాయినాల్లో తెలుగు

పచ్చమండపాల పెళ్ళిపేరంటాల్లో తెలుగు 

శతక పద్యాల నీతి మేళవింపుల్లో తెలుగు

శతమానపు దీవెనల తీపి తలపుల్లో తెలుగు  

పదముల పాడించు కృతిగతుల్లో తెలుగు 

పాదముల నాడించు నృత్యరీతుల్లో తెలుగు 

శాస్త్రముల శాసించు శిల్పగీతల్లో తెలుగు

మనసు పెడితే  

మనసు తడితే   

మనసు పడితే   

మనసు తడితో 

చదువుల పాలించు బుడతల రాతల్లో తెలుగు

యంత్రాలు లాలించు చిరులాలి పాటల్లో తెలుగు

వింతలు సాధించు చిరుతల మాటల్లో తెలుగు

ఈ జగాన తెలుగు

నీతోనే వెలుగు వెలుగు 

అందుకై నీ వంతు 

పాదములు కదుపు కదుపు

పదములు కలుపు కలుపు!     

ముందు తరాలకు

తెలుగు వదిలేది

మనం మనం!

ఎవరో మరేవరో 

ఇది మనం కాదని  

అనం అనం! 

ముందు తరాలకు

తెలుగు తెలిపేది

మన మనం

మనం మనం!