నేర్పే ప్రకృతి

సుమాల తీగన్నా, శిశిరాన మోడన్నా
తనలో వగచేనా,  వసంతాన మల్లెలై విరిసేనా!

ఈదురు గాలన్నా, ఎదురున బండున్నా
తరలి దుమికేనా, తెగువన ఎగసేనా!

మసకల మబ్బన్నా, మండే ఎండున్నా,
నీళ్ళు నమిలేనా, చినుకై తడిపేనా!

విరిసే పూవన్నా, రాలే దండన్నా,
ఒకరిపై మెరిసైనా, నేలలో కలిసేనా!

ఇంచుక పక్షన్నా, ఎదుటన కొండున్నా,
చుట్టూ దాటైనా, బతికేదారులు వెతికేనా!

నీటిలో చేపైనా, చేరనిది ఒడ్డన్నా,
బతుకే ఆపేనా, ఈదక వదిలేనా!

ఒంటరి మనసన్నా, వదలని గోడున్నా,
ప్రకృతి చూసైనా, నమ్మిక కలిగేనా!

వడి సడి ఆగేలా, కదలక ఓడేనా!
గడి, తడి తొలగేలా, వదలక పోరాడేనా!
వెతలపై నడిచైనా, కతలై మెరిసేనా!