వెలుగులకోసం ఖాళీగా చీకట్లో ఉన్నప్పుడు
సహనపు వెలుగుతో సరిగా నడవటం మొదలెట్టేయ్!
వెన్నెలవేషం నిండారా వేసుకున్నప్పుడు
ఇసుకరేణువుల ఆగని చూపుల క్షణాలను నిలబెట్టేయ్!
నిటారువృక్షం నీఎత్తును నీముందే చిన్న అన్నప్పుడు
నీడను వెతకక గొడ్డలితాకే అహమును తగలెట్టేయ్!
విశాలచెరువు విధిగా వానల నిండున్నప్పుడు
నాథుడులేడని నాదని పాకే ఆక్రమణకామపు బొందినికట్టేయ్!
నీతోవుండే నలుగురితోడుకు నీవే మొదలూచివరైనప్పుడు
నీవూ నేననే నిటారుగీతలు మరినీకెందుకు? అవి తుడిచెట్టేయ్!
ప్రతిదీ నీదే, నువు నేర్చినదే, నీతోడన్నదే,
చూసే కన్నులు, ఏడ్చే కన్నులు, చేర్చే తెన్నులు,
ఎవరి నియంత్రణో, నీకు తెలుసన్నదే
తెలుసుకునేందుకు పదపద లేచి, నీలో రవిని నీవే కనిపెట్టేయ్!
No comments:
Post a Comment