శిశిరం వచ్చెళ్ళింది
నిన్న కనులకివేవీ లేవు!
వసంతం సృష్టించింది
నేడు, కనువెలుగుల తావు!
పగటివేగం పరిగెత్తించింది
చతుశ్చక్రాలు కనులకే కనరావు!
చీకటి శాంతితో నిలిపింది
అచేతనారీతి కలలరూపాల వెలిమావు!
చుట్టూ కదలకపోతే కదిలాననుకునే నీవు
చుట్టూ కన్నులనార్పని కమలాలనేల కనలేవు?
తొలిచే ప్రతివిషయం
తెలవారుపున తెలుపు కథంటే!
తెలియని ప్రతి సమాధానం
తిరిగే ఋతుశ్చక్రగతి నీదంటే!
తెరగు తెలిసిన జ్ఞానాంకురాన్ని
వయసువసంతంలో పెంచి
శిశిరగమ్యానికి చేర్చే
సజీవమూర్తి చేతనతో
సృష్టి అందంగా నిన్నే మలచుకోవడం, నీవు!
పిపీలికంలా ప్రపంచం నాదేనంటూ
ప్రతిసృష్టికి పరమావధిమంత్రాలు సృష్టించానంటే
కదలదనుకున్న ప్రతిదీ ఒక్కక్షణం కదిల్తే
ప్రళయమనే పెనుభూతానికి పుట్టుకవు, పరిధివే నీవు!
(చంద్ర రెంటచింతల - జూన్ 3 2017)
No comments:
Post a Comment