నూతనవత్సర మన్నను
పాతను తరముటయె గాదు పాఠము గొనియున్
జోతలువెట్టెడి శుభముల
చేతలనే జేయగలుగ చేరును శుభముల్!
కోతల కోరికలున్నను
జాతకరీతులు గదలవు జాముల నడిమిన్
చేతగు మంచిని పంచగ
చేతులు గదిలెడి మనసులు చేరును సుగతుల్!
నూతనవత్సర మన్నను
పాతను తరముటయె గాదు పాఠము గొనియున్
జోతలువెట్టెడి శుభముల
చేతలనే జేయగలుగ చేరును శుభముల్!
కోతల కోరికలున్నను
జాతకరీతులు గదలవు జాముల నడిమిన్
చేతగు మంచిని పంచగ
చేతులు గదిలెడి మనసులు చేరును సుగతుల్!
దంగాలంటూ పిల్లలు
కంగాళముజేయరంట కంచే గొనరే!
బంగారము దేశమునకు
నంగనలకు ధైర్యమిచ్చునంతగ గనరే!
పరుగున కూతురి జూడను
కరిగెను గుండెలు గనగను కరతాళములే
సరియను శబ్దములీవని
పరుగిడి మోతన కలిసెను పట్టులుబట్టన్!
అమ్మా! చేయగలేమని
చెమ్మను జార్చుటనునాపి చెవులను వినిరే
అమ్మానాన్నల మాటల
నమ్మిక నిలపగ గదిలిన నవయుగ వనితల్!
జాస్తిగ జేసెడి నటనను
కుస్తీపడి జూడు జనత కుశలము గావన్
కుస్తీయాస్తిగ గలిగిన
బస్తీవనితల గెలుపును బలమై గనరే!
ఆకాశంలో సూర్యకిరణాలు
చేరే వేలమైళ్ళ కోణాలు
నువ్వూ నేనూ
నీడన నడిచే జీవితకాలం పచార్లు!
రాత్రంటే వెన్నెలరేలా
జార్చే అమృత ప్రకృతివనాలు
నువ్వూ నేనూ
నీడలజాడన వెలుగుగాలం జాలర్లు!
ఎత్తైన పర్వతం
పైనెక్కడో మేఘాలు
పెరిగేసిన చెట్టూగుట్ట
ఎదిగానను ఆకాశహర్మ్యాలు
వెలుగు తలల వంచి
చూపే నీడపట్టు మంచి
మేమిచ్చాం బదులేదంటే
మనసంతా వెలుగును వెదికి
మనదనే నీడనుజేసి
మనుగడనే చదవమనింది!
అన్యోన్యాశ్రయ విడిదుల్లో
ప్రకృతి ప్రభాతభాసం
సహధర్మ సావాసం
అనాతపసుధాకోశం!
జారుతున్న నక్షత్రం
చేరుతున్న వానచుక్క
పారుతున్న నది
ఇవేవీ నావి కావు
కానీ ఆనందాన్నిచ్చేవే!
ఎత్తుని తక్కువచేసే చెట్టూ
చిత్తుగ ఓడించే పర్వతం
కొత్తగ అందంజూపే హరివిల్లు
ఇవేవీ నా అసూయకు చేరవు
కానీ ఆనందాన్నిచ్చేవే!
మైళ్ళు పైకెడుతున్న నీరు
మళ్ళీ నీకే అంటున్న మేఘాలు
కుళ్ళు తాకనీయని పసిరూపాలు
ఇవన్నీ నా కనుభావనలే, మారవు
అన్నీ ఆనందాన్నిచ్చేవే!
అన్నీ
చేరినకాలం
చేరేగమ్యం
చేవను మర్మం
చేసే భావశిల్పాలే!
కొమ్మపై రెపరెపలాడుతున్న రెండాకులు
అమ్మను తలుచుకుని విడివడక ఊగాయి!
కన్నీరు పన్నీరుగా మారి
శశివదన వైపే చూస్తోంది
కరుణవదిలి నిధికి దారేదంటే
కావలి స్టాలిను దారెతుకుతున్నాడు!
వెనక శశివదనే శశివదనే
ముందు చిన్నమ్మా చిలకమ్మా
పదేపదే వినబడుతున్న పాట
వదలని అదే పూనకపు ఆట!
పాట మారి ఒక రోజయ్యింది
అంతకుముందు
ఎవరికెవరు ఈలోకంలో
తర్వాత లలిత ప్రియ కమలం
అమ్మంటే అమ్మరా
వస్తునేవున్నాయి
మధ్యలో
ఒక గుండె ఆగి
రెండాకులు మళ్ళీ చెట్టెక్కాయి!
పాటలు మరొక్కసారి!
కళ్ళల్లో నీళ్ళసరస్సు
గూళ్ళు కట్టుకున్న అనుభూతిపక్షులు
ఈదుతూ అంచుల్లోపలే బతకాలంటుంటే
ఈదురుగాలి అలలుచేసి నడిపిస్తోంది
గూళ్ళు చెదరనీయని జ్ఞాపకాలపుల్లలను
ఏరుకుంటూ
నేను
నేనే అనుకునే నేను!
పైనుండిపడ్డ ఒక నీటిచుక్క
తనను వదిలేసినా మరవని కళ్ళు
సరస్సును రెప్పలపొరల్లో దాచి
పక్షులను కాపాడుకుంటున్నాయి
వాటిని తటీతీరాన
వెతుక్కుంటూ
నేను
నేనూ అనుకుంటూ నేను!
మురళినిబట్టెడి బాలుడు
సరళముగా పాడుకొనుచు సరగున నెగసెన్
వరముగ దొరికెను తెలుగుకు
సరమే స్వరపేటికంచు సరిగమ మురిసెన్!
నగుమోమున నగుమోమును
జగమున తత్వము తెలిపెడి జతిగొన తానే
వగచుచు శోకము పాడిన
జగదానందకృతివిను జగమున తానే!
థిల్లానల ధీమంతుడు
సల్లాపముజేసె తాను సహవిద్వత్తున్!
అల్లాడించెను యందురు
ఉల్లాసము మదిని జేర నుర్వేమెచ్చెన్!
ఎందరు మహానుభావులు
అందరితో కలిసితాను నందముజేసెన్
వందలలో యొకడందురు
అందని రత్నము తనకును అందగలేదే!
తృష్ణను పాడెను మురళీ
కృష్ణుడు రాముని పొగడెడి కృతులను పాడెన్!
నిష్ణాతుడు భావమునే
విష్ణుపదముజేర్చి తాను విష్ణువుజేరెన్!
శంకరుజేతిన శరమా?
వంకలు వాగుల దుమికెడి శశిచెలి శరమా?
అంకపు శైలజ శిరమా?
వంకలుబోగోరు యక్షరవంకీ శిగవే !
1.
ఆరని రాత్రి
నీటిచుక్క చప్పుడు
నేనన్న శబ్దం!
2.
ఏటి తారలు
ధాటి శీతవర్షం
నిశ్చలత మాయం
3.
కారడవి నిశ్శబ్దం
పడిన పండు
నీటి చప్పుడు!
4.
వడగండ్లవాన
అగాధ అనంతాల
ఏకాంతము
5.
చలి నిర్జనత
వాననీటీ తొట్టి
పిచ్చుకల ప్రయాణం!
6.
మసక సంధ్య
మసలిన గతం
మోస్తరు దూరం
7.
జెల్ల పిల్లిమొగ్గ
మేఘం కదలిక
కాలువ పిల్లగట్టులో
8.
పడిన పుష్పం
కొమ్మనెక్కుతుందా?
సీతాకోకచిలుక.
సురలే వేడిరియనుకొన
కరిమకరములే కనుమను కథలును లేవే!
వరమది హరినే తలచుట
శరణాగతిజొచ్చువారి శక్తే హరియున్!
సిరి తానొచ్చిన నొచ్చును
కరిమొర వినగనె హరికిని కదలిక యొచ్చెన్
కరిగన కారుణ్యాక్షడు
సిరినే విడిచియు వచ్చెను సిరియన యదియేన్!
వచ్చెడి వాడే హరియని
వచ్చిన చచ్చెదనని తెలిసి వరముగ వేచెన్
వచ్చుట నాపడు హరియే
ఇచ్చెను మోక్షము మకరికి ఇలవేలుపుగాన్!
కరుణను దొరికిన సుధయే
సురలకు వెతలగు కథలున సూక్ష్మత తెలిపెన్!
తరుణోపాయము హరియే
మరణపు తలుపుల నిలిచెడి మనుషులకిలలోన్!
నువ్వే మాలక్ష్మివని
మా తోడున అక్కవని
ఎదిగిన రోజున అందరి
ఎదలను నవ్వాగెనెలా?
నీదీ ఒక ఊపిరని
నీకున్నవి విలువలని
నీతోడై నడిచిన రోజున
నడకలలో కలవరెలా?
నీ గుండెయే మెత్తనని
అది గుచ్చిన కందునని
ఎదురున గురివింజలలా
తన పోటుల మాటలెలా?
తనదని తిరిగొచ్చెనని
మలిమెలికన తోడుయని
తన ఇంటనే తిరుగాడిన
ఏ నాన్నకు ఏడుపెలా?
తనకున్నవి తిత్తులని
తన కూతురి భర్తకని
తను వరమిచ్చే దేవుడైనా
తన కూతురు నడగడెలా?
తన పెనిమిటి డబ్బులని
తను మారిన వీడు మబ్బులని
తపనతో సరిచేసిన
తరుణికి దొరకదే వరములలా?
తన కాలికి మెట్టెలని
తొలి గురుతుగ పెట్టెనని
తలచిన ఆ మనసుగతే
తనదగ్గర చేర్చెనిలా!
మనసులు కలిసే రోజు
బతుకుల కలగను రోజు
మహిలో మధురిమ తెలిసిన
కలిసిన బతుకులే రోజూ!
నీతోనే పుట్టిందా ధనమదం
ఏమైనా తట్టిందా జనహితం!
నీడంటూ పోగేసే ప్రతిగజం
ఎండంటూ తాకనిదే! అది నిజం!
"నీతోనే”
---
ఎవరైనా తట్టారో ఇవ్వడం
అటుపైనా గిట్టారో తవ్వడం
గిరిగీసి అప్పిచ్చే ఈ పని
విరిచేసి నొప్పించదా నీవని
"నీతోనే"
----
నీతోనే నడిచొచ్చిన ఆడది
నేనంటూ కలిసొచ్చిన తోడది
నువ్వే కావాలనే అడుగది
మువ్వై కలవాలనే సడియది!
"నీతోనే"
నీచుట్టూ దేవుడిలా తిరగడం
కలిసుంటే చాలంటూ అడగడం
ఆ తండ్రికి బతుకంటూ కదలడం
తెలుసంటా, మనసుంటే నిలపడం
"నీతోనే"
-----
నువ్వేంటో చూపించే అవసరం
నువ్వంటూ కదలలేని నిర్ణయం
నీకైనా తెలిసేనా ఆ క్షణం
నీడల్లే తోడెవరో ప్రతిక్షణం
"నీతోనే"
-----
నువ్వే నాకంత అనే ఆ నిధి
నువ్వెంత నాకన్నదలే ఆ విధి
నువ్వులతో వదలమాకు ఆ సిరి
నీవెంటే కదులుతోంది చూడు మరి!
"నీతోనే"వతం!
నీడంటూ పోగేసే ప్రతిగజం
ఎండంటూ తాకనిదే! అది నిజం!
"నీతోనే”
---
ఎవరైనా తట్టారో ఇవ్వడం
అటుపైనా గిట్టారో తవ్వడం
గిరిగీసి అప్పిచ్చే ఈ పని
విరిచేసి నొప్పించదా నీవని
"నీతోనే"
----
నీతోనే నడిచొచ్చిన ఆడది
నేనంటూ కలిసొచ్చిన తోడది
నువ్వే కావాలనే అడుగది
మువ్వై కలవాలనే సడియది!
"నీతోనే"
నీచుట్టూ దేవుడిలా తిరగడం
కలిసుంటే చాలంటూ అడగడం
ఆ తండ్రికి బతుకంటూ కదలడం
తెలుసంటా, మనసుంటే నిలపడం
"నీతోనే"
-----
నువ్వేంటో చూపించే అవసరం
నువ్వంటూ కదలలేని నిర్ణయం
నీకైనా తెలిసేనా ఆ క్షణం
నీడల్లే తోడెవరో ప్రతిక్షణం
"నీతోనే"
-----
నువ్వే నాకంత అనే ఆ నిధి
నువ్వెంత నాకన్నదలే ఆ విధి
నువ్వులతో వదలమాకు ఆ సిరి
నీవెంటే కదులుతోంది చూడు మరి!
"నీతోనే"
ఇదే స్నేహం
ఇదే మోహం
ఇదే వెలుతురు
ఇదే చీకటి
ఇదే తీర్థం
ఇదే స్వార్థం
ఇదే?మతము
మానవతము
మనసు హితము
మన సహితము
హిందూ మతము
అల్లా హితము
మంచి తడిసిన
మనసు జతిలో
మనిషి తెలిపే
మనసు సితము!
*******************
*
ఏ దేవుని వరమైనది స్నేహం!
ఏ దేవుని వరమైనది స్నేహం!
మానవతే మెలిపెట్టిన దారం!
కలయికలో మతాలకే దూరం!
కనికట్టుకు కనుకుట్టే స్నేహం!
మెలిపెట్టని మనసులదీ స్నేహం!
"ఏ దేవుని"
*
గుడితీర్థమిచ్చిందా స్నేహం
నమాజున పక్కనుందా నేస్తం!
ఎవరినడిగి పెరిగిందీ ప్రేమా!
ఎవరికొరకు ఆగేదీ జన్మా!
పూలజడన చూపిన ఆ ప్రేమా
అలజడిలో కనలేనిదమ్మ!
ఖీరుపెట్టు చేతులలో ఆ జానూ
కాలుకడుగు రొజేమాయనయ్యా!
*
పుట్టుకలో అమ్మనొప్పి నాపిందా ఏ దైవం!
చచ్చాకను మట్టిలోన కలివనిదా ఈ రూపం!
ప్రాణాల కాపలావాడు మతమేదో తెలియనోడు!
ప్రాణాలు కాపాడేనాడు కులమేదో అడగరాడు!
"ఏ దేవుని"
*
పెరిగేందుకు చేయిచ్చిన పూబాల ఇది!
కలిసేందుకు తనుమారిన కనరాని నది!
నడిచేందుకు తోడొచ్చినా కనరాదు విధి!
జడిసేందుకు నీడెక్కడని అనలేని మది!
"ఏ దేవుని"
*
చదరంగపు పావులతో కలిసినావా?
చరమాంకపు తోడులతో కలవలేవా?
మతమంటల మనసులలో వెన్నెలేది?
చితిమంటల తలపులలో మిన్నులేవి?
పసిమనసుల ఆశలనే పెంచి పెంచి
కసిగుండెల శ్వాసలుగా దించి తుంచి
బతుకంటే బరువయ్యే కాలం
నువు కదిలితే కళ్ళల్లో గోళం
"ఏ దేవుని"
తక్షణము రమ్మన నాకే
శిక్షణయులేదే కవితకు శిక్షయను కొంటిన్
శిక్షణము వీక్షణమనియే
తక్షణమిటుల చేరుకొంటి తరమగ తెలుగే!
ఒకటో రెండో కావవి
ఒక యాభై కలయికలన నొచ్చిన మనసే
ఇక పద విని కను మనగా
నొక పదముల కందమందె నొచ్చక వినుడీ!
తెలుగును తడిమిన దొరలే
వెలుగుల భాషంటు పొగడ వెతకకు ఋజువే!
తెలుగన తరమగ వచ్చెడి
తెలుగుకు భక్తుల తపనను తెలియగలేమా!
వరముల భాషని తెలుసు
సరముల ముత్యాలవిరులు సరిగొన తెలుసున్!
వరముల ఛందములుండగ
శిరముల దిగనిది కవితని శితిగనె తెలుసున్!
కలంరాసే కులం
కొమ్ము తీసి రాసేస్తే
జలందాచే జులుం
కొమ్ములు తీసేస్తే!
మనసులేని మనిసి
గుడికొట్టేసి తలకట్టేస్తే!
రెప్పతెరిస్తే ముందర ఎన్నో రూపాలు
చూడంటూ తిరుగాడుతున్నాయి
కానీ కళ్ళు చూడాలనుకుని
కొన్నింటినే వెదుకుతున్నాయి!
నేనూ నేనంటూ తిరిగే
నైజాల నియమాలు తెలీక
రెప్పతాకని రేతిరిచూపులు
కలల్ని ఆశ్రయిస్తున్నాయి!
కలల్లో మళ్ళీ ఎన్నో రూపాలు
తెలిసినవి కొన్నీ
తెలియనివి ఎన్నో!
నీకు తెలీని నిన్నే
నీకోసం నిద్దరబుచ్చి
నిజమని భ్రమింపజేస్తున్నాయి!
పుట్టుక పగలైతే
కట్టెల రాత్రైతే
మళ్ళీ పగలేదని
ప్రశ్నించే జీవితకాలం
రోజుకు సమాంతరంగా
ఆయుష్షు పోసుకుంటోంది!
కళ్ళు కొన్నింటినే వెదుకుతున్నాయి!
కలలు కొన్నింటితోనే బతుకుతున్నాయి!
"ళ" మెలికల్ని విప్పుకుని
మరో పగలులో సమాధానం వెదుకుతోంది!
తత్వమసి!
బల్లలకే కాళ్ళొస్తే
మెల్లగబెట్టితి ననుకొను మెచ్చే కాఫీ
చల్లగ జారిటుపడెనే
తెల్లటి కప్పెక్కడనగ తెలతెలబోయెన్!
బల్లలకే కాళ్ళొస్తే
గుల్లగు జేబులు తడిమిరి గుమ్మము బయటన్!
చిల్లర చేతులు తడవక
మెల్లగ జరిగినది ఫైలు మెచ్చరు ఎవరున్!
అరిచే రోజా నిలువగ
చరిచే నాయకుల నిలుపు చలనము లేదే
చరిచిన బల్లలు కదిలిన
విరివిగ దొరుకునవి గనరు విసరగలేరే!
బల్లలకే కాళ్ళొస్తే
పిల్లలు వెంటనె వదలగ పిచ్చివి బడులే!
కల్లలు నామాటలనిన
ఒల్లము రామని పరుగిడ ఒజ్జల గనరే!
బల్లలకే కాళ్ళొస్తే
జల్లను పడతుల మనసులు జరిగిన టీవీన్!
ఇల్లున దేదియు గనినను
చిల్లుల సొట్టల విసిరిరి చివరికి టీవీన్!
కష్టాలెన్నో యున్నను
ఇష్టాలన్నీ అటకన ఇంజనిరింగే
నష్టాలేవీ లేవని
ఇష్టానికి మిత్రులిచ్చెనిలనే తెలియన్!
దొరికిన ఎన్సీసీకై
ఉరికిన ఆర్డీసి పరుగులు ఉరముకు మేలే
దొరికినదంతయు పట్టిన
దొరికిన ఆనందమంత దొరికినదచటన్!
కన్నులు నేలకు నిలుపుట
కన్నెల గొడవలు కలవక కన్నీరవకన్
వన్నెల జెండా నెత్తుట
మిన్నుల జేరను మురియుట మిగులుగ దొరికెన్!
లెక్కల మాస్టారి గొడవలు
పక్కన హాస్టలున లేని పరుగే పరుగున్!
ఎక్కడ యున్నను మిత్రులు
చుక్కలజూపిన చదువులు చుట్టములేలే!
విలువల మనుషుల మధ్యన
వెలుగుల వార్డెను గలిసిన వెతలెన్నెన్నో
తెలుగును తడిమిన వారూ
తెలుపగ కదలిన చదువరి తెలవారగనే!
అందరికందరు ఘనులే
ముందరి విద్యల మనసులు ముందర చదవన్!
పొందగ పసిడికి దారులు
అందము అక్కడ మొదలుగ అందుట తెలిసెన్!
చెప్పగ వినమే వినమా
తప్పక చెప్పిన వినుటయు తప్పనియెదమా!
ఒప్పని రసాయనమనే
చెప్పగ శ్రద్ధగ వినెదము చెవులకునింపున్!
నిండుగ తినినది లేదూ
మెండుగ నిద్రను తడవటమెందుననేదే!
దిండుగ పుస్తకమెట్టుకు
పండుగ సెలవుల కలగన పంతులు లేపే!
కళ్ళల్లో ఏదో వెదుకుతూ
ఏళ్ళయినా తేలని నిజాలు
ఊళ్ళెన్నో దాటిన ఇజాలు
ఉరికై గొంతుకు బిగిసిన ఉచ్చులా
వదలని కొందరి ఆఖరి ఊహలు!
పెల్లుబికిన కన్నీళ్ళలో
చెప్పకదాగిన ప్రశ్నలివేలే?
గెలిచిన కాశ్మీరం యుద్ధం
భూమిని వదిలిందెందుకు?
వదిలేసిన భూమిని మళ్ళీ
తెచ్చుకోని విజయాలెందుకు?
నిరాడంబరుడు లాల్బహదూరు
తాష్కెంటులో విగతమైందెందుకు?
నేతాజీ ఎగిరిన విమానం
ఎదిగిన మనిషిని దింపిందేది?
మహాత్ముని మంచితనమే
మనకు యాభైయేళ్ళదూరం
గాంధీలనిచ్చిందెందుకు?
వేళ్ళూనిన అస్తమించని సామ్రాజ్యం
వేళ్ళు పీకింది ఎడ్వినా నెహ్రూనా?
సంజయుడెగిరిన విమానం
సింధియా రాజేష్పైలటు
ఫిరోజులంతా పోయిందెలా?
ఢిల్లీలో గల్లీల్లో
సిక్కులను చంపిందెవరు?
యువరక్తం నిస్వార్థత్వం
చనిపోతే చరిత్రసారం
చట్టాలూ వారికి చుట్టాలు
అడగని ఈ అనంతప్రశ్నలు
దొరకని ఏ నిజానిజాలు
దొరికేటి మార్గాలేవి?
ఉరికేటి రక్తంనిండా
వదిలేయని ప్రశ్నలతో
సాగినదీ సగం జీవితం!
పుట్టితివట భారతమున
గట్టిగ మొదలెట్టినట్టి గమనము నీదే
పట్టియు శాంతియహింసలు
మట్టిని విడిపించినావు మహాత్ముడీవే!
దండిగ జనులే నీతో
దండిన నుప్పుకు నడిచిన దంతయు గనినన్!
దండలు వేయవె జేతులు
దండము బెట్టక వదలరు దండన దొరలున్!
కట్టిన బట్టను వడికెను
పట్టిన గట్టెను వదలక పథముల గదిలెన్!
కొట్టిన జెంపను జూపెను
గట్టిగ బట్టిన మనసున గమ్యము జేర్చెన్!
తెలుగే తెలుసని, తెలిసిన
తెలుగును పలకని తరువుల తెరలును తొలగే
తెలుగును తెలుగుగ పలుకగ
తెలుగే తడిసెను కనులను తెలిమది మురియన్!
దారాన్ని పట్టుకుని
ఎదిగిన
ఒక తీగ
తీగతో పచ్చని ఆకులు
ఆకులతో ఎదిగిన పూవు
పూవుతో తియ్యని మకరందం
మకరందంతో స్నేహపుభృంగం
భృంగంలో ఓ నిశ్శబ్దచలనం
ఆ చలనం చూస్తూ నేను!
ఆ నిశ్శబ్దంలో తడుస్తూ నేను!
దారం కనబడలేదు
చలనం చూస్తూంటే!
నిశ్శబ్దంలో తడుస్తూంటే!
మళ్ళీ వెనక్కితిరిగి
అన్నింటినీ
ఒక్కటొక్కటిగా చూస్తూ
అనుభవిస్తూ
ఆనందిస్తూ
పరవశిస్తూ
కదిలేవరకు
మదిలో సుధల
ఆధారపుదారం
వెదికేవరకు!
దారినిండా ఎన్నో జీవాలు
కొన్ని జీవంలేనివి కూడా!
ఆగిపోవడం తెలీని చుక్కలు
అంతేచేరాక నేలమీద నాట్యాలు!
ఆకాశానికి ఎదిగామనే వృక్షాలు
తల వంచిన జాబిలి నీడల కొనలు!
నీళ్ళల్లో గాలిలో మంచులో భూమిలోఎన్నో జీవాలు
అన్నీ జవాల్ని నింపుకుని బతికేస్తున్నాయి!
కొన్ని జీవాన్నొదలి భూమిలోకెళుతున్నాయి!
మనం అనుకునే మనంకూడా వాటిలో!
మనమే అనుకునే మనంకూడా వాటిలో!
నేను అనుకునే నేనుకూడా వాటిలో!
నేనే అని తెలుసుకున్న నేనుమాత్రం ఆ తృటిలో!
ఆనందం అన్నింటా దైవిక రూపాలను చూస్తూ!
ఆనందం అన్నీ దైవతరూపాలలో నేరుస్తూ!
ముందే నిర్ణయించిన దారినిండా ఎన్నో జీవాలు
అన్నింటా జీవం తెలిసిన నాడులే!
చిత్తమేమనె చిత్రమేదనె చిత్తుచిత్తుగ నోడగా
మెత్తమెత్తటి ముత్యమీదనిన మెట్టులే యిల జూపగా
విత్తనంబుల విద్యనేర్వగ విచ్చుమోదము నేర్చెగా
మొత్తమీవని మొట్టికాయల మొండినొంచిన నీవెగా!
మనసే మాటలు వినదని
మనసును జంపుకు దిరిగిన మనిషనలేమే
మనసా మనిషిని కదిపే
మనలోనేదో సుగతని మనిషిగ గనరే!
గొప్పలు పోయెడి సమయము
మొప్పల చేపను గనినను మొత్తము దెలియున్!
తిప్పలు తట్టుకునీదను
నిప్పగు నోరును తెరవవు నిలకడ నేర్పున్!
ఎప్పుడు నేనెంతన్నను
తప్పక జూడంగవలయు తరువులయనెదన్!
తుప్పల కాయలు గాసిన
తప్పకయణిగే గనబడు తత్వము దెలిపెన్!
చెప్పుడు మాటల వినుటను
తప్పుడు తలపుల తలుపులు తమవని తెరిచే
టప్పుడు, వినబడలేదా
చప్పుడుజేసే యెనకటి చర్నాకోలా?
ఎదిగిన మానును జూసిన
నొదిగిన విత్తనమనేది నొకపరిగనమే!
ఒదిగిన మేలగు నెత్తుల
నెదిగెదమనుమాట నీవె నేర్వగరావే!
కాళ్ళు నడుస్తున్నాయి
మంచు కప్పేస్తుంటే
మనసు నడిపిస్తోంది
ఇంకేదో ఉంది ఆ నడకలో
చరిత్ర తాకిన అడుగులు
దూరంగా ఏదో చప్పుడు
భయాన్ని పరిచయం చేసేది
ఇంతకుముందు
ఇప్పుడదంతా దినచర్యలో భాగం
కాంతిపుజం విసిరిన కనులకు
నల్లగుడ్లు చిల్లుతూటాలు
కనబడ్డాయి వినబడ్డాయి
కాళ్ళు కూరుకుపోతున్నా
నోళ్ళు పెగలకపోతున్నా
చేతిలో మరతుపాకీ
పనిచేసుకుపోతోంది
ఒక తూటా ఎక్కడో దిగింది
తెలిసేందుకు కర్తవ్యం అడ్డొస్తే
అడ్డు తొలగించుకుని కాల్చేస్తుంది
నల్లసిరాలా ఎదుటివాడిరక్తం
తెల్లటిమంచుపై రాసేస్తుంది
చీకటి చరిత్రని
ఆ చరిత్రలో నాకూ కొన్ని అక్షరాలని
తూటాలకు కారిన రక్తపుకాళ్ళు
అడుగుల గుర్తులేసి
జారగిలబడ్డాయి
ఆఖరిశత్రువు అంతంచూసి
ఆ అందెలని వెతుక్కుంటూ
అలాంటి వాళ్ళే వస్తున్నారు
అదే తపన
అవే గుర్తులు
సైనికుల కాళ్ళు!
మాటల మనోహరిగనెడి
నాటల కూర్చుండబెట్టి నాకముజూపన్
పాటల చైతన్య పదము
బాటన ప్రసాదమిదనె బాగోయనిరిన్!
కాంక్షల ధోనికి తానా
కాంక్షల తీర్చగ వెలుగగు కాంతుల దీపా
కాంక్షలు రాలినవి శుభా
కాంక్షలుగ ప్రసాదుగారి కాంక్షల దీర్చన్!
అట్టాగిట్టాగను పద
మెట్టాగోట్టా గొనవలె నెట్టుకొనట్టా
అట్టట్టే యన్నట్టే
నిట్టుగ కట్టలుగపట్ట నిట్టే గిట్టున్!
క్షీరపు సాగరమందున
బీరపు దేవతలు వెదికిన బీదలు కారే!
సారపు యంచే నాకపు
దారను వారలు వెదికెడి దారులు వేరే!
భారపు మందర వినెను
కోరల వాసుకి వినెమరి కోరిన ధర్మం!
భారము నీదే యనుచును
కోరగ కూర్మమును మోసి కోర్కెలు దీర్చున్!
చలువల శశినీ విడిచిరి
విలవగు మాయమ్మ లక్ష్మి విడిచిరసురులే!
జిలుగుల కోరికలావును
వెలుగగు కల్పతరువొదిలి వెతలను గొనిరే!
చచ్చుటనాపుట చాలని
వచ్చుటనాపని వరముల వదులుటనేలా!
వచ్చును గరళము చావై
మచ్చుక ధైర్యము సడలి చెమరికే యొచ్చున్!
అరిచిరి సురలుయరులు చా
వరయగ చేరన్! గరళము వరముగ గనగా
మరచిన వానిని కొలిచిరి
హరహరయని సురలసురులు హరమును గావన్!
రక్షణకును రావాయన
తక్షణమే హరుడుజేరి తమమును గొనడే!
మోక్షపు దారుల మొదలని
రక్షణకును కోర రాడె రమముగ హరియున్!
వచ్చిన యమృత భాండము
చచ్చుట నాపుట పిదపని చవిగొన చిచ్చే
యొచ్చెను మొదలై, కావగ
నొచ్చిన మోహినిని కనులనోపగ జిచ్చే!
రాహూకేతుల జిత్తుల
బాహూలందిన శరీరభాగము లీలా
మహిమల ఖండము కావగ
ఆహా! ధర్మము తెలియగ సాహోయనమే!
ధర్మము అర్థము కామము
కర్మల జూపగ సురలను కథలుగ జూపన్
మర్మము జీవనమందున
ధర్మము నిలుపుట ననుకొన ధన్యతనొందున్!
మోక్షపు దారుల వెదికే
రాక్షసవర మార్గమంతను రావే వరముల్!
చక్షువులెక్కడ జూసిన
శిక్షణమక్కడ దొరకును శిరములయొంచన్!
మనమున ముదమును గానక
వనమును చరమును చలువను వదలకుమనియే
ఘనముగ నేర్పిన కతలివి
కనగను గరళము వెనకను కనుగొన సుధలే!
జనులా కవితను పొగడగ
కనులే ఎక్కవు తలమరి కతయన యదియే!
మనకే దొరికిన మద్దెల
మనమే వాయించుకొన్న మనసుకు హాయే!
ఖైరతాబాదు పెద్దవాణ్ణి వేసేందుకు ఒకరిద్దరు సరిపోరేమో, అందర్నీ మోసేందుకు ఒక ఇరవై రాయలసీమ సుమోలు, పది లాతూరు లారీలు, పోలవరం ప్రొక్లెయిన్లు, కొల్లేరు క్రేన్లు తెప్పించండి. 500మంది తో ప్రతిచోట మనుషులు వెనకే ఉండి వదలక పొజిషనింగ్, అలసిపోకుండా సింగింగ్ డాన్సింగ్ వెనక పెట్టండీ, సింగ్ నింగ్ అన్నానని వాళ్ళు పంజాబీలు చైనావాళ్ళు కారు సుమీ! గల్లీ గల్లీకి గలభాచేయటానికి రంగుల్లో జనం, ఎవ్వరినీ గుర్తుపట్టలేనంత రంగేయండి, హుసేన్ సాగర్ దగ్గర ఇంకో యాభైమందిని పెట్టండి. ఎవ్వరూ దాటడానికి వీల్లేదు. ఎవరన్నా దాటితే వేసేయండి వాళ్ళని (లెక్కెట్టుకునే). పెద్దాయన్ని దండంపెట్టుకుని వేసేశాక పెద్ద సౌండొస్తుంది, అది ఎప్పుడొచ్చేదే భయపడమాకే. మరో దండంపెట్టుకుని నాకు మిస్డ్ కాలివ్వు, అలజడి తగ్గాక వచ్చి డబ్బులు పట్టుకుపో. (వినాయకుడు అతడు ప్లాన్)
సీ:
కేకలైకులు లేక లైకుకేకల కేక
కేక కేకే లైకు కేకలైకు
కేక లైకులులేక లైకు కేకల కేక
కేక కేకే లైకుకేక లైకు
కేకలైకులులేక లైకు కేకలకేక
కేక కేకే లైకు కేక లైకు
కేకలైకులు లేక లైకుకేకల కేక
కేక కేకేలైకు కేక లైకు
గీ :
కేక కొకలైకు లికలేక కేకలైకు
కేకకొక లైకు లికలేక కేకలైకు
కేకకొకలైకు లికలేక కేకలైకు
కేక కొకలైకు లికలేక కేక లైకు
సీ:
లైకు కేకకు లేక కేక లైకుకు లేక
లైకు లేకా కేక లైకు కేక
లైకు కేకకు లేక కేక లైకుకు లేక
లైకు లేకా కేక లైకు కేక
లైకు కేకకు లేక కేక లైకుకు లేక
లైకు లేకా కేక లైకు కేక
లైకు కేకకు లేక కేక లైకుకు లేక
లైకు లేకా కేక లైకు కేక
గీ :
లైకులొకకేక కికలేక లైకుకేక
లైకులొకకేక కికలేక లైకుకేక
లైకులొకకేక కికలేక లైకుకేక
లైకులొకకేక కికలేక లైకుకేక
(Ganeswar Rao గారికి మేకతోకను గుర్తుచేసినందుకు కృతఙ్ఞతలతో)
పవన కళ్యాణం
వేదిక : కాకినాడ
సమస్త జనులకక్షింతలు జూసి కందాక్షతలు(గుంపులో ఎవరిపైబడ్డాయో తెలీదు):
నామము కళ్యాణపుత్ర
నామము మారి చిరుగాలి నామము గొనగన్!
నామము రక్తపు యువకుల
నామము తానైన పంగనామము దెప్పెన్!
గొంతున్నందుకు అరిచెను
వంతల అభిమానులజూచి వంతని యరిచెన్!
కొంతను కొంతయు అరిచిన
గంతల మాటున బతికెడి గండము వదులున్!
అరిచిన అరిచెను యందురు
అరివిరుల గొనగను పవనుడరిచిన దేమో!
అరిగని అరవక యున్నను
కరిగని కాచెడి దెవరని కదలగ నరిచెన్!
అన్నను గావగ యుండక
మన్నున మామిడిని పెంచు మన్నుల మనిషే
వెన్నుగ మనుషుల జేరిచి
వెన్నుల మిథ్యని మనమను వెతలను మనిషే!
బొట్టుల పెట్టియు నెట్టిన
కొట్టుట తిట్టుటయు పుట్టిగొట్టుట గుట్టై
గట్టుల పెట్టిన యొట్టుల
కొట్టులు పెట్టుకును పొట్టగొట్టగ నెవరే!
పుట్టుట గిట్టుట ముట్టక
మెట్టల బతికేటి వారు మేదిని లేరే!
గుట్టల మూటల రట్టుకు
బుట్టల కోరికల గోర బుట్టుక మేలే!