2017

నూతనవత్సర మన్నను
పాతను తరముటయె గాదు పాఠము గొనియున్
జోతలువెట్టెడి శుభముల
చేతలనే జేయగలుగ చేరును శుభముల్!

కోతల కోరికలున్నను
జాతకరీతులు గదలవు జాముల నడిమిన్
చేతగు మంచిని పంచగ
చేతులు గదిలెడి మనసులు చేరును సుగతుల్!

దంగాల్

దంగాలంటూ పిల్లలు
కంగాళముజేయరంట కంచే గొనరే!
బంగారము దేశమునకు
నంగనలకు ధైర్యమిచ్చునంతగ గనరే!

పరుగున కూతురి జూడను
కరిగెను గుండెలు గనగను కరతాళములే
సరియను శబ్దములీవని
పరుగిడి మోతన కలిసెను పట్టులుబట్టన్!

అమ్మా! చేయగలేమని
చెమ్మను జార్చుటనునాపి చెవులను వినిరే
అమ్మానాన్నల మాటల
నమ్మిక నిలపగ గదిలిన నవయుగ వనితల్!

జాస్తిగ జేసెడి నటనను
కుస్తీపడి జూడు జనత కుశలము గావన్
కుస్తీయాస్తిగ గలిగిన
బస్తీవనితల గెలుపును బలమై గనరే!

అనాతపసుధాకోశం

ఆకాశంలో సూర్యకిరణాలు
చేరే వేలమైళ్ళ కోణాలు
నువ్వూ నేనూ
నీడన నడిచే జీవితకాలం పచార్లు!

రాత్రంటే వెన్నెలరేలా
జార్చే అమృత ప్రకృతివనాలు
నువ్వూ నేనూ
నీడలజాడన వెలుగుగాలం జాలర్లు!

ఎత్తైన పర్వతం
పైనెక్కడో మేఘాలు
పెరిగేసిన చెట్టూగుట్ట
ఎదిగానను ఆకాశహర్మ్యాలు
వెలుగు తలల వంచి
చూపే నీడపట్టు మంచి
మేమిచ్చాం బదులేదంటే
మనసంతా వెలుగును వెదికి
మనదనే నీడనుజేసి
మనుగడనే చదవమనింది!
అన్యోన్యాశ్రయ విడిదుల్లో
ప్రకృతి ప్రభాతభాసం
సహధర్మ సావాసం
అనాతపసుధాకోశం!

భావశిల్పాలు

జారుతున్న నక్షత్రం
చేరుతున్న వానచుక్క
పారుతున్న నది
ఇవేవీ నావి కావు
కానీ ఆనందాన్నిచ్చేవే!

ఎత్తుని తక్కువచేసే చెట్టూ
చిత్తుగ ఓడించే పర్వతం
కొత్తగ అందంజూపే హరివిల్లు
ఇవేవీ నా అసూయకు చేరవు
కానీ ఆనందాన్నిచ్చేవే!

మైళ్ళు పైకెడుతున్న నీరు
మళ్ళీ నీకే అంటున్న మేఘాలు
కుళ్ళు తాకనీయని పసిరూపాలు
ఇవన్నీ నా కనుభావనలే, మారవు
అన్నీ ఆనందాన్నిచ్చేవే!
అన్నీ
చేరినకాలం
చేరేగమ్యం
చేవను మర్మం
చేసే భావశిల్పాలే!

రెండాకులు

కొమ్మపై రెపరెపలాడుతున్న రెండాకులు
అమ్మను తలుచుకుని విడివడక ఊగాయి!

కన్నీరు పన్నీరుగా మారి
శశివదన వైపే చూస్తోంది

కరుణవదిలి నిధికి దారేదంటే
కావలి స్టాలిను దారెతుకుతున్నాడు!

వెనక శశివదనే శశివదనే
ముందు చిన్నమ్మా చిలకమ్మా
పదేపదే వినబడుతున్న పాట
వదలని అదే పూనకపు ఆట!

పాట మారి ఒక రోజయ్యింది

అంతకుముందు
ఎవరికెవరు ఈలోకంలో
తర్వాత లలిత ప్రియ కమలం
అమ్మంటే అమ్మరా
వస్తునేవున్నాయి

మధ్యలో
ఒక గుండె ఆగి
రెండాకులు మళ్ళీ చెట్టెక్కాయి!
పాటలు మరొక్కసారి!