చుట్టూపక్కల చూడరా అంటే
రోజూ దయని కళ్ళల్లో పెట్టుకుని చూస్తునే ఉన్నా!
నమ్మకు నమ్మకు ఈ రేయిని అంటే
రేయింబగళ్ళ తేడా మనసుతో వింటూనే ఉన్నా!
నిగ్గదీసి అడుగు ఈ సిగ్గులేని జనాన్ని అంటే
సిగ్గుని పెంపొందించుకునే అక్షరంగా మారుతూనే ఉన్నా!
కలలను కళ్ళతో చూస్తూ పదమంటే
వేదంలా రోజూ వింటూ కళ్ళను తెరుచుకు తిరుగుతున్నా!
మునుముందేదో తెలియని చిత్రం అంటే
ప్రతిక్షణాన్ని ఆనందించటం నేర్చుకుని అనుభవిస్తూనే ఉన్నా!
ప్రకృతికాంతకు ఎన్నెన్ని సిరులంటే
నిజసిరులను ప్రకృతి ఆకృతుల్లో చూస్తునే ఎదుగుతూ ఉన్నా!
ఏంటయ్యా! ఇంతలా తిప్పుకు తిరుగుతావు?
పదమై పాదాల్ని కదుపుతావు
మనోవినోదినివై జీవననాదాన్ని వినిపిస్తావు
నీ మయూఖతంత్రులనాదంలో మేమంతా మురిసిపోతుంటే
మామూలుమనిషిలా మరలిపోతావు
ఓ మహర్షీ! నీ దారి మనసులను కదపడం అయితే
ఆ దారివెంట రేణువులలో ఒక చైతన్యం ఉందని తెలిసి
పాదస్పర్శ తాకాలని తపించే అభిమానరేణువుని
కనికరించే వరంకోసం, మనసుపడే జీవితకాలం తపస్సు
వరమిచ్చే దేవుడివి, స్వరమిచ్చే చైతన్యానివి నీవే!
నీకూ ఓ తపస్సుంటే, వరాలతో కరుణించాలని
నీతో అక్షరసుమాలై పూయించే ఆ చైతన్యమూర్తికి వేడుకోలు!
జన్మదిన శుభాకాంక్షలు!