గాలి అనేది నీ నా చుట్టూ అన్నింటావున్నా
దేవుణ్ణి విగ్రహాల వరసల్లోచూసి
వెతుకుతున్నాడు మనిషి!
నీటికి నీ నా దాహం తీర్చే శక్తున్నా
గంగమ్మని కొందరికే పరిమితం చేసి
గిరిగీతల ఆనకట్టలు కడుతున్నాడు మనిషి!
భూమికి చెట్టుకి నిన్నూ నన్నూ నిలబెట్టే ఓర్పున్నా
హర్మ్యాలకోసం తూట్లు పొడిచి
హరితవస్త్రాపహరణాలు చేస్తున్నాడు మనిషి!
ఆకాశానికి నీకూ నాకూ అందాన్నిచూపే నేర్పున్నా
కిటికీలకు గాజుల్ని పరదాల్ని కప్పేసి
ప్రకృతిఅందాల్ని కృత్రిమగాజుగోడలపై వేస్తున్నాడు మనిషి!
అగ్నిగా మండే గుణం గుండెల్లో దుమికేస్తున్నా
సొంత ప్రాంత వింత ముంతల్లో విభేదవిద్వేషాలను రాజేసి
మాటల్లేని నిర్జీవభస్మానికి దగ్గరగా కాల్చేసుకుంటున్నాడు మనిషి!
పంచభూతాల కలయిక తానై పుట్టిన ప్రపంచంలో
ఇంచుకైనా సార్థకత వెదకనంటే
మానవత్వం మనిషి సొత్తని
మనసుకరుణ మహికి విత్తని తెలిసే
తనకుతెలియని తెలివినే మరి
వెదకలేడా వెన్నుకాడా వింతమనిషి!
