2016 ఆహ్వానం

తొలిపొద్దని లేచి
ఙ్ఞానసముపార్జనకై
తొలిపాఠకుడనై
ప్రపంచపుటల తలుపు తెరిస్తే
అక్షరపు అచ్చునుంచి
మదిని తట్టిలేపి తొలచివేసే
దృశ్యాల పార్శ్వాలలో
ఎటుచూసినా

అమానుషత్వపు మస్తిష్కాల హేల
ఆరోపణలు అగ్నిపరీక్షల లీల
ఇంగితంలేని ఙ్ఞానబోధన
ఈసడింపుల గళాలరోదన
ఉన్మాదుల నీచశక్తి
ఊకదంపుడు సినీసుత్తి
ఎంతుందనే ఆర్భాటపు చిత్రీకరణలు
ఏం జరుగనుందో ముందు తెలీని శంకుస్థాపనలు
ఐదుపదులైనా యువకులమనే ఆటవికులు
ఒట్టులు పెట్టుకునే వాగ్ఘటికులు
ఓటుల్లా అవి చేరే ప్రజాస్వామ్య గట్టులు
ఔషధాల ప్రకటనల మెరుపుపొట్టులు
అంతర్జాలపు క్లుప్త గాలికబుర్లు
అంతఃకరణశుద్ధి లేని ప్రవచనాలు

రాబోయే పొద్దులో
గొడ్డులం కాదని ఉలికిపడే అనుభూతుల్ని
కాసింత మనుషులమని గర్వపడే అధ్యాయాల్ని
కూసింత మనసులతో ఎదురుపడే ఆప్యాయతల్ని
కాలంతో మరచిపోలేక మదినివడే ఆలోచనల్ని
అమృతాక్షర నిలువల విలువల జగతిని
మానవాళికి ప్రసాదించుము ప్రభూ!