మొన్న పొద్దున చూసాను
మొదటిసారి
తను ఆడుకుంటున్నప్పుడు
నిర్మలానందం
అప్పుడే నిద్రలేచినట్టుంది
చక్కటి ఒత్తుజుట్టు
అప్పుడే పుట్టినట్టు
తెలిమంచు తుళ్లింతల్లో
జంకూగొంకులేని కేరింతల్లో
నవ్వుకుంటూంది
ఇది నా ప్రపంచం
నువ్వే పరాయివాడివన్నట్టు
కోపంగా బుంగమూతితో
నా వైపు చూసింది
నీతో కచ్చి అన్నట్టు
పరిగెత్తి వెళిపోయింది
నిన్న హడావిడిలో వున్నానో ఏమో
తప్పక చూడాల్సిన
ప్రకృతి అందం
మళ్ళీ చూసా
పసిమనసు శృతిచేస్తే
పక్కున నవ్వుతూ
సిగ్గుబుగ్గలతో చెట్టెక్కేసింది
ఈ రోజు పొద్దునా
అదే హడావిడి
మితవేగంగా వెళుతున్న కారు
చారల మార్గం దాటేందుకు
దూరంగా బడికి వెళ్తున్న పిల్లలు
రాజమార్గంలా దారిమధ్యలో
పరిగెడుతూన్న తనని
మరలి చూసా
వడివడిగా వెళుతూ
వెనక్కి తిరిగి
కోపంగా చూసింది
మళ్ళీ ఇది నా ప్రపంచం అన్నట్టు
మనసు చివుక్కుమంది
ముందుకెళితే
చివాలున వేగంతగ్గి
శివాలైన మనసుకు ఒగ్గి
వెనక్కుమరలి చూసి
తనకేమీ కాలేదని తెలిసి
సహజానందంతో
మనిషిగా రోజు మొదలయేందుకు
మార్గం చూపింది
చిట్టి బుడత! ఉడత!
No comments:
Post a Comment